संविधान दिवसको अवसरमा सम्पूर्ण नेपाली दिदीबहिनी तथा दाजुभाइमा हार्दिक शुभकामना व्यक्त गर्दछु।

नेपालको संविधानले सार्वभौमसत्ता नेपाली जनतामा निहित गर्दै नागरिकका अधिकार, स्वतन्त्रता, समानता, सामाजिक न्याय र सहभागितालाई लोकतान्त्रिक व्यवस्थाको आधार बनाएको छ। संविधानको वास्तविक अर्थ त्यसका अक्षरमा मात्र होइन, नागरिकले आफ्नो जीवनमा अनुभूति गर्ने अधिकार, सम्मान र अवसरमा हुन्छ।

मेरो राजनीतिक बुझाइमा संविधानको केन्द्रमा नागरिक छन् भने राजनीतिको केन्द्रमा पनि नागरिक नै हुनुपर्छ। नागरिकलाई केवल मतदाता होइन, नीति निर्माण र सार्वजनिक निर्णयका सचेत साझेदारका रूपमा स्थापित गर्ने तथा सत्तालाई अधिकारको सुविधा होइन, जनताप्रतिको जिम्मेवारीका रूपमा स्थापित गर्ने राजनीतिक संस्कार आजको आवश्यकता हो।

प्रश्न गर्ने नागरिक, पारदर्शी शासन र जवाफदेही राजनीति यिनै हुन् जीवन्त लोकतन्त्रका आधार हो भन्ने मेरो बुझाई छ l

संविधान दिवसले हामी सबैलाई अधिकारसँगै आफ्नो नागरिक जिम्मेवारी सम्झाउँदै नागरिकको आवाज, सहभागिता र सम्मानलाई केन्द्रमा राख्ने राजनीतिक संस्कार निर्माण गर्ने प्रेरणा प्रदान गरोस्।

नागरिक बलियो भए लोकतन्त्र बलियो हुन्छ।
लोकतन्त्र बलियो भए संविधानको मर्म बलियो हुन्छ।

संविधान दिवसको पुनः हार्दिक शुभकामना।